للصيادلة : كيفية اختيار عقد عمل للسعودية ؟؟؟ - نقابة الصيادلة الحكوميين
أخر الأخبار
السبت، 22 نوفمبر، 2014

للصيادلة : كيفية اختيار عقد عمل للسعودية ؟؟؟




الكلام كتر عن السفر اليومين دول وعلشان تبقى على نور بص على الكلام اللى جى ده علشان يبقى كله على نور ومحدش يرجع يندم . 

اسافر ولا مااسافرش؟؟  طيب هسافر . 



بنتسال كتير !!!  لو سمحت عاوز أسافر انا جايلى سلسلة مش عارف مين او صيدلية مستوصف او فردى ؟؟

 ايه رايك ؟؟ طيب تسمع عنهم ؟؟؟ 



شوف يادكتورنا العزيز  :) 



 مما لاشك فيه ان الأوضاع صعبة حبيتين تلاتة قول تلات حبات , اذن محتاجين نسافر بأسرع وقت علشان نلحق نعمل اى حاجة .




صح بس المشكلة إنك لو ماحسبتهاش وأخدت بالأسباب فعلا مش هتعمل اى حاجة ..



 احسبها ازاى يعنى  ???? مش هنشتغل وناخد راتبنا وكله تمام  ؟؟؟؟ 



 فى الاماكن المشهورة اه , فى المؤسسات (الشركات يعنى صيدليات او دعاية او مستشفى كبير ) اه , لكن فى الفردى انت وحظك , فى السلاسل النص نص انت وحظك , فى المستوصفات انت وحظك .




 ايه ده هو انا ممكن راتبى ينقص ؟؟؟  مش فيه عقد ولا ايه ؟??  




حصل وكلامك مظبوط بس فيه أساليب للأسف مش تمام ممكن تقص راتبك بالحداقة ???


 يعنى لو المكان مسؤل عن طلبياته حد غيرك انت وزميلك عادى يطلبلك كميات من أصناف بالهبل او إكسبيره قريب وتشيل قيمته عليك انت وزميلك


 يعنى ممكن ببساطة أديك بدل سكن قليل جدا وراتب أقل ومافيش تذاكر طيران ليك او لزوجتك وأولادك او اطلع حنين واشيلك جزء وانا جزء .



 او  اطلع ضلالى وابلطج على سعادتك واقص باى سبب (تجديدات بقى تصاريح وخلافه ) .



 لا ياعم انا الحمد لله سالت والكفيل زى الفل وكله تمام ..  ربنا يوفقك طبعا , بس هقولك الجملة اللى بقولها لأى حد يسالنى انه ممكن ييجى المملكة  ويلاقى الكلام أتغير اول ما يوصل وعلشان كده بنقول فنط العقد حتة حتة .



 صحيح زى ماقولنا فى النقطة اللى فاتت ممكن تتقلب بالاصول بس احنا بنفترض انك رضيت من الاول وماسمعتش النقط اللى هقولهالك دلوقتى !! 



- ورقتك وقلمك وخطط (ماتسمعش كلام بتوع ياعم توكل على الله وفكك لو فعلا بيتوكلوا على الله كانوا خدوا بالاسباب وماتغلطش غلطة غلطناها بس الحمد لله ادينا بنتعلم ) , شوف أهدافك محتاج تعمل ايه فى اد ايه وانا هاخد كام يساعدنى أعمل ايه علشان ماتدورش فى ساقية وخلاص .


- انوى الخير (انك لازلت بخير مانويت الخير ) وخلى عندك امل ربنا يكرمك .


- بص على العقد كويس أقرا اللى ليك واللى عليك وأحسب راتبك الشهرى (اه بلاش تحسبها بالمصرى الله يخليك) لما تسافر مش هتشترى أكلك - ملابسك - عربيتك - اثاث بيتك بالمصرى فمعناها لو الراتب أقل من النورمال حواليك بحاجة بسيطة ممكن يمشى الحال , لو العملية بعيدة نصيحة استنى واهدى . 


-  أى مؤسسة لها إدارة وقوانين داخلية ومعروفة  لها الأولوية عندك حتى لو هتستنى شوية وتحاول (افتكر المساوىء الى اتكلمنا عليها ) 


طيب ليه مؤسسات يعنى ؟؟؟



* لها قوانين داخلية واللى هيمشى عليك هيمشى على الكل 


* فى الأغلب لن تظلم


* حقك هتاخده لأخر ( ريال- درهم - ...... ) ====> وأكيد لكل قاعدة إستثناء بس احنا على قد ما نقدر نتحرى السلامة وربنا يسلمكم .


*  لو حصل لاقدر الله ومش عاوز تكمل حسب العقد لو فيه شروط جزائية ( استقلت قبل مدة معينة مثلا) هتدفعه , لو مافيش وبقيت تمام من بكرة هتاخد جواز سفرك وترجع بسلام |||| الموضوع ده مش متاح فى الغالب لو إختلفت مع كفيل صيدليات فردية أو سلاسل صغيرة أو مستوصفات صغيرة ودى نقطة فى غاية الخطورة بالعكس ممكن يقعدك بدون عمل لحد ما تتنازل عن حقوقك ويتعبك وفى الأخر ممكن ينزلك بس بدون مايديك ورقة إنهاء فى المكان ده واللى من غيرها ماتعرفش تشتغل فى مكان تانى لو حبيت ترجع ||||


*  نقطة مهمة ماحدش بيركز عليها مع انها كنز إستراتيجى برضه , غالبا المؤسسة (الشركة ) بتعملك برامج تدريب ده فى حد ذاته كنز ليك بتستفيد وتطور نفسك فى البزنس الخاص بيك بعد كده . 


- قبل مااسافر أعمل ايه ؟؟؟؟؟



 * إسال عن المكان اللى جايلك منه الفرصة (المكاتب يعنى ثم المكان اللى هشتغل فيه ) لأنه برضه بيتعامل بالرأس (عفوا فى التعبير بس ده واقع ) أجيبلك كام راس واخد مقابلها كام فهيقعد يعملك البحر طحينة يبقى زى ماتفقنا , إسال عن المكتب كويس وبعدين ان شاء الله اسال على مكان الشغل ثم اقرا العقد كويس واتوكل على الله .




* خلاص تمام والدنيا حلوة لا استنى  , عاوزك تدور فى العقد على التالى  !!!! 




  • عدد ساعات العمل
  • الراتب الأساسى 
  • كيفية حساب الأوفر تايم 
  • تذاكر الطيران على مين ولكام فرد علشان لو معاك زوجتك وولادك 
  •  التامين الطبى ليك ولزوجتك وشوف كام فرد من الاولاد 
  •  بدل السكن ( وركزلى أوى على قيمته لو كنت هتشتغل فى مدن زى جدة والرياض والدمام لانها غاليه فى السكن وممكن تدفع     من جيبك كمان
  • أجازتك كل قد ايه (يعنى ليك اجازة هتنزلها كل كام شهراو سنة ) 




لو قلنا السعودية كمثال .:- 




1- أشهر مؤسستين تروح عندهم -النهدى - الدواء .

(حاليا المتحدة العملية عندهم ملخبطة وممكن تتعب ) .

2- لازم كفالتك تبقى على اسم المؤسسة او تحديدا المكان اللى هتشتغل فيه .

مثال:  د\محمد كفالته ( بيسو للخدمات الطبية) إذن لازم يبقى إقامتك (بطاقتك اللى هتمشى بيها هناك ) مكتوب فيها مكان العمل : (بيسو للخمات الطبية ) والا هتضطر تغير الاقامة وهتوجع قلبك وعليها مشاكل فركز من الاول .

3- فيه نظام معين للمملكة من حيث العادات والتقاليد انت ملتزم تتبعه العملية مختلفة عن عندنا شوية فتعود نفسك . 

4- حاول تحج بأسرع وقت محدش ضامن عمره .

دول كده نقط مختصرة علشان الناس الى بتسال عن السفر ومحتارة , أتمنى من الله انها تكون جاوبت على تساؤلات الزملاء وربنا يبارك لكم ويسهل لكم أمركم . 

وماتنسوش تدعولنا بقى :) :) 



د\ محمد رمضان 
للصيادلة : كيفية اختيار عقد عمل للسعودية ؟؟؟ Reviewed by mostafa mahmoud on 7:56 م Rating: 5 الكلام كتر عن السفر اليومين دول وعلشان تبقى على نور بص على الكلام اللى جى ده علشان يبقى كله على نور ومحدش يرجع يندم .  اسافر ولا مااس...